Sinadya Sa Halaran 2011

ROXAS CITY - Nangin madinuagon ang pagbukas sang selebrasyon sang Sinadya sa Halaran 2011 Festival sa probinsya sang Capiz.

Ginsuguran ang kahiwatan sa isa ka thanksgiving mass sa Roxas City Metropolitan Cathedral nga gintambungan sang mga opisyales sang syudad sang Roxas kag probinsya sang Capiz.

Nagpalayag sang ila tagsa ka mga mensahe sang pag-abi-abi kag pag-imbitar sanday Governor Victor Tanco Sr. kag Roxas City Mayor Alan Celino sa ginhiwat nga isa ka malip-ot nga seremonya matapos ang flag raising ceremony nga ginpasakupan man sang 16 ka mga kabanwahanan sang probinsya.

Pag-bot sang kasisidmon gindugokan naman sang linibo ka mga tumalan-aw ang ginhiwat nga tradisyunal nga prosesyon sa Panay River ukon fluvial parade sang imahen ni Immaculado Conception kag ang tuigan nga pyrotechnic display.

Nagdugang man sang duag sa nasambit nga prosisyon ang dululungan nga pagpasiga sang mga Christmas light sa mga kakahuyan nga nagapalibot sa syudad.

Gindugukan man sang linibo ka mga tumalan-aw ang pormal nga pagbukas sang seafood festival sa diin ginpakita ang nagkalain-lain nga mga seafoods sa Roxas City.